उडीद डाळीचा हलवा (गोड शिरा)

 

उडीद डाळीचा हलवा (गोड शिरा)

 

साहित्य : एक वाटी उडीद डाळ,पाव वाटी मुगाची डाळ,दीड वाट्या  साजूक तूप, अडीच  वाट्या साखर (आवडीनुसार कमी-जास्त),एक छोटा चमचा प्रत्येकी जायफळ-वेलची पूड , १०-१५ बेदाणे,प्रत्येकी ५-६ काजू पाकळी,बदाम व पिस्ते यांचे काप, २-३ थेंब जिलबीचा खाद्य रंग.

कृती :  एका बाउलमध्ये उडीद डाळ+मुगाची डाळ रात्रभर  भिजत घालून ठेवा. सकाळी चाळणीवर ती डाळ उपसून घ्या व पाणी निथळून घेतल्यावर मिक्सरवर भरड (रवा) वाटून घ्या.

आता गॅसवर एका नॉन स्टिक पॅनमध्ये साजूक तूप गरम करून त्यात हा   मिक्सरवर वाटलेला  भरड  डाळीचा रवा   घालून मध्यम आंचेवर एक सारखे परतत रहा म्हणजे डाळीच्या वाटलेल्या रव्याचा  लगदा तळाला चिकटणार नाही. परतत असतांना डाळीच्या रव्याचा  रंग पालटून तो गोल्डन ब्राऊन होऊन सगळीकडून तूप सुटायला  लागले की त्यात साखर घाला व परतणे चालूच ठेवा. साखर पुर्णपणे विरघळून डाळीशी एकजीव झाली की दोन-तीन थेंब जिलबीचा खाद्य रंग, वेलची व जायफळ पूड,बेदाणे व थोडेसे काजू,पिस्ते आणि बदामांचे काप घालून पांच मिनिटे परतून घ्या आणि पॅनवर झाकण ठेवून गॅस बंद करा.

सर्व्हिंग प्लेटमध्ये हलव्याच्या मुदी पाडून  घ्या आणि  त्या उडीद डाळीच्या हलव्या च्या मुदिंवर  वर थोडेसे काजू,पिस्ते आणि बदामांचे काप घालून गरमागरम हलवा  सर्व्ह करा.