रविवार स्पेशल नाश्ता :
इन्स्टंट रेडी मिक्स पोहे
साहित्य : दोन वाट्या जाड पोहे ,एक कांदा,मटार दाणे, शेंगदाणे अर्धी मूठ, फोडणीसाठी तेल,मोहरी,जिरे,हळद व हिंग, कढीपत्त्याची आठ-दहा पाने ,चविनुसार हिरव्या मिरचयांचे तुकडे,साखर,मीठ व लिंबाचा रस व सजावटीसाठी वरून घालण्यासाठी बारीक चिरलेली कोथिंबीर,ओल्या नारळाचा खवलेला चव व बारीक शेव.
कृती : आगोदर एका वाटीत पाणी घेऊन मटार भिजत टाका. मग गॅसवर मंद आंचेवर एका कढईत जाड पोहे सोनेरी रंगावर भाजून घ्या व एका परातीत काढून ठेवा. कांदा चिरून घ्या. आता गॅसवर काढईत फोडणीसाठी तेल तापवून घेऊन त्यांत मोहरी,जिरे,हिंग , हळद व हिरव्या मिरच्यांचे तुकडे घाला व फोडणी झाल्यावर त्यांत कढीपत्त्याची आठ-दहा पाने टाकून परतवून घ्या मग मटार दाणे व शेंगदाणे टाकून चांगले परतून घ्या, सर्वात शेवटी भाजून ठेवलेले पोहे टाकून परता,परतत असतांनाच अखेरीस चवीनुसार साखर,मीठ व लिंबाचा रस घालून मिसळून घ्या. मिश्रण कोरडे होईतोपर्यंत परतत रहा. मिश्रण चांगले कोरडे झाल्यावर त्यावर बारीक चिरलेली कोथिंबीर टाकून वर झाकण ठेवा व गॅस बंद करा. गार झाल्यावर ही रेडी पोहे मिक्स एका काचेच्या बाटलीत भरून ठेवा.
टीप : प्रवासाला ,सहलीला जातांना सोबत नेता येतील किंवा अचानक पाहुणे आल्यावर ५ मिनिटात गरमागरम पोहे सर्व्ह करू शकाल.
रेडी पोहे मिक्स वापरुन असे करा झटपट पोहे.
कृती : गॅसवर पॅन तापत ठेवा
त्यामध्ये कपभर पाणी टाका
थोडं बटर, एक मिरची बारीक चिरून, थोडं मीठ टाका
पाण्याला उकळी येऊ द्या,
त्यात इन्स्टंट पोह्याच्या डब्यातील जरुरीपुरते मिश्रण काढून ते हलक्या हाताने उकळत्या पाण्यात सोडा.
गॅस मंद आचेवर ठेवा.
हलक्या हाताने सर्व मिश्रण हळूहळू खालीवर करा !
नंतर मंद आंचेवर पॅन वर झाकणांत पाणी घालून ते झाकण ठेवून पाच मिनिट थांबा !
झाले मस्त गरम गरम 'तोंपासु' चविष्ट पोहे !
वाटल्यास वरून स्वादासाठी थोडी ताजी कोथिंबीर चिरून टाका, ओलं खोबर असेल तर बेस्ट ! त्याचा थोडा चव टाका !
अन एन्जॉय करा !!
ना तेलाची गरज ना फोडणीची धावपळ !
पाच मिनिटात पोहे तयार !
