दही बुत्ती भात

         " दही बुत्ती भात " 

साहित्य  :   एक वाटी दिल्ली राईस किंवा बासमती तांदळाचा नेहमीप्रमाणे शिजवलेला साधा भात ,  दोन वाटया गोड घट्ट दही , एक वाटी दुध  , चवीनुसार  मीठ व साखर ,  एक मोठा चमचा साजूक तूप  ,  एक चमचा जिरे ,पाच –सहा सांडगी तळणीच्या मिरच्या ,दोन तीन काश्मिरी सुक्या लाल मिरच्या ,  आठ – दहा कढीपत्त्याची पाने , थोडी  बारीक चिरलेली कोथिंबीर .

कृती  :  शिजलेल्या मोकळा  भातात गोड घट्ट दही , दुध , चवीनुसार  साखर  व  मीठ घालून भात मऊसर कालवावा . 

गॅसवर एका कढईत एका मोठ्ठ्या चमचाभर साजूक  तुपात जिरे , कढीपत्ता आणि सांगडी मिरच्या व दोन तीन काश्मिरी सुक्या लाल मिरच्या घालून परतून घ्याव्या , व  मिरच्या जरा कुस्कराव्या आणि ती फोडणी भातात मिसळावी .  

सर्व्ह करतेवेळी बारीक चिरलेली  कोथिंबीर घालून भात वाढवा . 

टीप : हा भात प्रवासात न्यायला सोयीचा पडतो . मात्र असा प्रवासात घ्यायच्या भातात दुध जास्त घालून दह्याचे  प्रमाण थोडे कमी करावे जेणेकरून भात फार आंबट किंवा कोरडा होणार  नाही .