शेंगदाण्याची स्वादिष्ट व कुरकुरीत भजी

 

शेंगदाण्याची कुरकुरीत भजी 

 

 

साहित्य : एक वाटी सालं काढलेले शेंगदाणे,एक छोटी वाटी बेसन पीठ,अर्धा चमचा धने-जिरे पावडर, चवीनुसार हिरव्या मिरचीचा ठेचा,चार लसूण पाकळ्या बारीक चिरून, चिरलेली कोथिंबीर , कढी  पत्त्याची पाने, लाल तिखट ,गोडा मसाला,चवीनुसार मीठ आणि भजी तळणीसाठी आवश्यकतेनुसार तेल.

कृती : प्रथम एका पातेल्यात सालं काढलेले शेंगदाणे, सैंधव मीठ आणि पाणी घ्या व गॅसवर शेंगदाणे मिठाच्या पाण्यात उकडून घ्या. उकडून झाले की चाळणीवर काढून निथळत ठेवा.

शेंगदाण्यातले पाणी  निघून गेले व दाणे कोरडे झाले की मिक्सरच्या भांड्यात टाका. त्यातच धने-जिरे पावडर, हिरव्या मिरचीचा ठेचा,लसूण पाकळ्यांचे बारीक चिरलेले तुकडे,मीठ, लाल टिखट ,गोडा मसाला, कढी  पत्त्याची पाने व चिरलेली कोथिंबीर आणि अर्धी वाटी पाणी  घालून मिक्सरवर वाटून घ्या.

मिक्सरवर वाटलेले शेंगदाण्याचे मसाला वाटण एका बाऊलमध्ये काढून  घ्या आणि त्यात बेसन पीठ घालून मिक्स करा. बाजयाच्या पिठासारखे बनले की  दहा मिनिटे मूरत  ठेवा.

दुसरीकडे गॅसवर एका फ्राय पॅन मध्ये भजी तळण्यासाठी तेल तापायला ठेवा.

मुरलेले शेंगदाणा भज्याचे ओले पीठ (बॅटर) एका दुधाच्या रिकाम्या प्लास्टिकच्या  पिशवीत भरून मेंदीचा असतो तसा कोन बनवा( प्लास्टिकच्या)कोनला / पिशवीला कोपऱ्यात एक बारीक छिद्र पाडा.

पॅन मधील तेल चांगले तापले असेल तर त्या तापलेल्या तेलात  या प्लॅस्टिक कोनमधून हळूहळू  दाब देऊन जिलबीचे पीठ घालतो तशी भजी सोडा आणि सोनेरी रंगावर तळून काढा.

टोमॅटो सॉस किंवा ओल्या खोबऱ्याच्या हिरव्या चटणी सोबत ही स्वादिष्ट व कुरकुरीत शेंगदाण्याची भजी सर्व्ह करा.

 

 

 

ब्रेड रवा व पोहे यांचा मिश्र उपमा

 

ब्रेड रवा व पोहे यांचा मिश्र उपमा 

 

 

साहित्य : एक बेडचा स्लाइस, एक छोटी वाटी रवा,अर्धी मूठ जाड (कांदा-पोह्याचे) पोहे , एक कांदा (चिरून),एक टोमॅटो फोडी करून,चवीनुसार तिखट,मीठ ,चवीपुरती साखर,दोन चमचे लिंबाचा रस,कढीपत्ता,चिरलेली कोथिंबीर,फोडणीसाठी तेल व तूप,फोडणीचे साहित्य -हळद,हिंग,मोहरी,जिरे पूड,धने पूड,कढीपत्त्याची पाने.

कृती : प्रथमपोहे भिजत घालून ठेवा. नंतर  गॅसवर मंद आंचेवर एका कढईत तेल व तूप यांच्यावर रवा सोनेरी रंगावर भाजल्याचा खमंग व सुवास येईपर्यंत भाजून घ्या. नंतर त्याच कढईत रव्याच्या चारपट पाणी गरम करायला ठेवा. त्या पाण्यात चवीनुसार तिखट व मीठ घाला. चविपुरती साखर व दोन चमचे लिंबाचा रस घाला.  पाण्याला उकळी आली की त्या कढईत पावाचा स्लाइस सोडा आणि उलथण्याने पांवाहे बारीक तुकडे कौन घोंटून  घ्या. पावाचा लगदा झाला की त्यातह भाजून हेवलेला रवा घाला  आणि कलथ्याने हलवत रंहा. रवा-पाव चांगले मिक्स झाले की भजत ठेवलेले पोहे घालून कलथ्याने हलवत मिक्स करून घ्या. काढाईवर झाकण ठेवून झाकणात पाणी घालून चांगली वाफ काढून घ्या .

दुसरीकडे गॅसवर एका काढल्यात तेल-तुपाची फोडणी करून घ्या फोडणीत हळद-हिंग,मोहरी,जिरे-धने पूड, कढीपत्त्याची पाने घालून ती तडका फोडणी कढईतील पाव-रवा-पोहे यांच्या मिश्रणावर ओता. कलथ्याने खालीवर हलवून मिक्स करून घ्या . वर चिरलेली कोथिंबीर घालून झाकण ठेवून एक वाफ काढून घ्या.

तुमचा ब्रेड रवा व पोहे यांचा मिश्र उपमा सर्व्ह करायला तयार आहे.

 

बागेसाठीआवश्यक कुंड्यांबाबत माहिती

 

कुंडी : कुंडी म्हणून कुंभार वाड्यात  मिळणार्‍या मातीच्या अगर बाजारात विकत मिळणाऱ्या 

प्लास्टिकचा विविध  आकाराच्या आकर्षक कुंड्या, सिरामीकच्या आकर्षक व विविध आकारात बाजारात

 उपलब्धअसलेल्या कुंड्या,पत्र्याचे  गोल, चौकोनी आकारातील डबे,ड्रम्स,प्लास्टिकचे

 डबे,ड्रम्स,थर्मोकोलचे अगदी लहान आकारा पासून मोठ्या आकारा पर्यन्त हवे तसे मिळू शकणारे चौकोनी किंवा  आयताकृती  खोके काहीही चालू शकते.

माझ्या मते थर्मोकोलचे आपल्याला हवे त्या साईजचे आयताकृती आकाराचे खोके कुंडी म्हणून सर्वात उत्तम !

 आजकाल मेडीकलच्या डिस्ट्रिब्युटरकडून / दुकानातून असे रिकामे खोके मिळू शकतात. 

  थर्मोकोल वजनाने खूपच हलके असल्याने ज्येष्ठ व्यक्तींना या कुंड्या बागेत हाताळणे अतिशय सोपे

 जाते हे एक महत्वाचे कारण व दुसरे असे की थर्मोकोल हे पाण्याने सडत आगर कुजत नाही,किंवा

 याचेवर कसलाही रासायनिक अगदी अ‍ॅसिडचाही परिणाम होत नाही.त्याला पाण्याचा निचरा 

 होण्यासाठी ण्यासाठी भोके पाडणे सुद्धा सहज व सोपे जाते . साधा लोखंडी खिळा किंवा स्क्रू ड्रायव्हर  वापरुन भोके पाडता येतात. 

  

कुळीथ पिठाच्या पौष्टिक व स्वादिष्ट वड्या

कुळीथ पिठाच्या पौष्टिक व स्वादिष्ट वड्या

साहित्य : अर्धी वाटी कुळीथाचे पीठ,दोन टेबलस्पून कणिक,एक टेबलस्पून बेसन पीठ,अर्धी वाटी साजूक तूप,एक पूर्ण पिकलेले केळे,एक वाटी किसलेला गुळ ,एक वाटी ओल्या नारळाचा चव,एक छोटा चमचा वेलची पूड,एक चमचा खसखस,१०-१२ बेदाणे व १०-१२ काजू पाकळी

कृती : एका नॉनस्टिक पॅन मध्ये साजूक तुपावर अर्धी वाटी कुळीथाचे पीठ ,दोन चमचे कणिक आणि एक चमचा बेसन पीठ खमंग सुवास येईपर्यंत भाजून घ्या.

त्याच पॅनमध्ये थोड्याशा साजूक तुपात १०-१२ बेदाणे व १०-१२ काजू पाकळी परतून घ्या.

आता त्याच पॅनमध्ये ओल्या नारळाचा चव,किसलेला गूळ आणि कुस्करलेले पिकलेले केळे घालून खमंग परतून / शिजवून घ्या. शिजत असतांनाच त्यात खसखस व वेलची पूड घाला. एक छोटा चमचा मीठ घाला. या मिश्रणातच तुपावर परतलेले १०-१२ बेदाणे व १०-१२ काजू पाकळी घालून मिक्स करून घ्या.

गॅस बंद करून त्यात खमंग भाजलेली कुळीथ पीठ,कणिक आणि बेसन पीठ घालून कलथ्याने मिक्स करून घ्या.

एका स्टीलच्या थाळ्याला आतील बाजूने सगळीकडे साजूक तुपाचा हात चोळून घेऊन त्यात हे मिश्रण ओता व सगळीकडे सारख्या जाडीत पसरा.

सुरीला दोन्हीकडे तुपाचा हात लावून आपल्याला हव्या त्या आकारात वड्या कापून ठेवा.

थाळ्यातील वड्या थंड व घट्ट झाल्यावर सूरीच्या सहाय्याने वड्या थाळ्यातून काढून घट्ट झाकणाच्या डब्यात भरून ठेवा.

थंडीत रोज सकाळी या स्वादिष्ट व पौष्टिक वड्या खाव्यात.

ताकातील पालेभाज्या

 

ताकात बनवल्या जाणाऱ्या पालेभाज्या

पालक, मेथी,करडई,चंदनबटवा,राजगिरा ,मुळ्याचा पाला,शेपू,माठ,घोळ,चवळी,अंबाडी,भेंडी,हरभरा,  आणि चाकवत या पालेभाज्या ताकात बनवतात.

मेथी,भेंडी,पालक,काकडी,पडवळ अशी कोणतीही भाजी  घालून ताकातले पिठले सुद्धा छान लागते.

राजस्थानी कढीला सिंधी कढी असेही म्हणतात. ही कढी बनविण्यासाठी जिरे, मेथीदाणे, सुक्या लाल मिरच्या, हिरव्या मिरच्या, कढीपत्ता, हिंग, बेसन, हळद, लाल तिखट, चवीनुसार मीठ, थोडी साखर, गरम पाणी, कोथिंबीर, सोबत अनेक भाज्या गवार, गाजर, वांगी, शेवगा,फरसबी, भेंडी, बटाटा, रताळा, सोयाबीनचे. या सर्व भाज्या  घालून ताकाची बेसन लावून कढी बनवतात .

कषाय (औषधी वनस्पतींचा आरोग्यदायी काढा)

कषाय (औषधी वनस्पतींचा आरोग्यदायी काढा)

साहित्य : एक टेबलस्पून धने,अर्धा टेबलस्पून जिरे,तीन वेलदोडे,तीन लवंगा,एक टेबलस्पून गुळाची पावडर ,एक चमचा काळीमिरी पावडर,एक चमचा आल्याचा कीस,तीन टेबलस्पून दूध (चवीनुसार कमी-जास्त करावे)

कषाय पावडर बनवण्याची कृती : धने,जिरे,लवंगा व वेलदोडे एकत्र घेऊन मिक्सरमधून फिरवून पावडर बनवून घ्या. (जर ही पावडर जास्त दिवस ठेवायची असेल तर आगोदार हे जिन्नस भाजून घ्या)

कषाय (काढा) पेयाची कृती : एका पॅन मध्ये एक कपभर पाणी त्यात एक चमचाभर कषाय पावडर ,हळद ,आल्याचा कीस,चवीनुसार गूळ व साखर घालून उकळून घ्या. आता त्यात २-४ चमचे दूध घालून गरम असतांनाच प्यायला द्या.

टीप : थंडीत प्यावा. आरोग्य उत्तम रहाते.

कुळथाचे (हुलगे) माडगं

कुळथाचे (हुलगे) माडगं

साहित्य : दोन वाट्या मोड आलेल्या कुळथाचे/हुलग्याचं पीठ (मोड आलेले कुळीथ / हुलग्याचे दाणे तुपावर भाजून मिक्सरवर बारीक दळून पीठ बनवावं),पाव वाटी तांदूळाची पिठी,एक ग्लास दूध,अर्धा किलो गूळ,दोन टेबलस्पून साजूक तूप,७-८काजुच्या पाकळ्या,७-८ बदामांचे काप,७-८ बेदाणे,अर्धी मूठ चारोळया,एक छोटा चमचा मीठ.

कृती : प्रथम गॅसवर एका पॅनमध्ये कुळथाचे पीठ व तांदूळाची पिठी साजूक तुपावर लालसर होई पर्यंत भाजून घ्या. एक ग्लासभर पाणी घेऊन त्यात गूळ विरघळून घ्यावा,नंतर त्यात कुळथाचे पीठ व तांदूळाची पिठी घालून खिरीसारखे शिजवून घ्यावं .मग त्यात एक ग्लास दूध,काजूचे तुकडे,बदामांचे काप,बेदाणे आणि चारोळया घालून आणखी शिजवा. यात वेलदोड्यांची पूड घालायची गरज पडत नाही. कारण भाजलेल्या कुळथांना (हुलग्यांना) त्यांचाच एक प्रकारचा सुगंध असतो.

सगळ्यात शेवटी साजूक तूप घालून गॅस बंद करा. गॅसवरून खाली काढून सर्व्हिंग बाउल्स भरा आणि गरम गरम नाश्त्यासाठी सर्व्ह करा.

कुळथाचं माडगं थंडीत खूप पौष्टिक मानलं जातं.

कुळीथ खूपच पौष्टिक असतात,गुळातून लोह मिळते म्हणून पौष्टिक असते

लहान मुले, वयोवृद्ध , गरोदर स्त्रीया व बाळंतीणींसाठी उत्तम सात्विक आहार !!!