बीटच्या पुऱ्या
साहित्य: दोन वाट्या
कणिक, एक मध्यम
आकाराचा बिटचा कंद उकडून व किसून ,मोहनसाठी साजूक तूप, चवीनुसार मीठ व
तिखट
कृती : एका परातीत कणिक
घेऊन त्यात उकडून किसलेला बीटाचा कीस, साजूक
तुपाचे मोहन ,मीठ व तिखट घालून पीठ घट्ट मळून घ्या. मळून घेतलेला पीठाचा गोळा ओल्या सुती कापडाने झाकून मुरत ठेवा.
तासभराने मुरलेली कणिक चांगली
तिंबून घ्या.
उंडे (गोळे) करून पुऱ्या लाटा.
गॅसवरती एका कढईत तेल अगर वनस्पती तूप गरम करून पुऱ्या तळून काढा.
बाजरीचा पौष्टिक खिचडा (खास थंडीसाठी)
साहित्य : एक वाटी
बाजरी,एक वाटी मुगाची डाळ,५-६ लसणाच्या पाकळ्या,चवीनुसार १-२ हिरव्या मिरच्यांचे तुकडे,एक छोटा चमचा हळद,एक छोटा चमचा तिखट,चवीनुसार मीठ व बारीक
चिरलेली कोथिंबीर व लसणाची फोडणी.
कृती : आगोदर बाजरी
स्वच्छ धुवून घेऊन १५-२० मिनिटे भिजत ठेवा. नंतर ती मिक्सरवर ओबडधोबड वाटून घ्यावी.
आता गॅसवर एका कढईत ८-१० वाट्या पाणी उकळायला ठेवा. पाण्याला उकळी आली की त्यात हे
बाजरीचे वाटण घालून ढवळत राहावे. गुठळ्या होऊ देऊ नयेत. २-३ मिनिटे नीट उकळून
घेतल्यावर त्यात मुगाची डाळ टाकावी. मिरची व लसणाचे वाटण घालावे. हळद,तिखट व चवीनुसार मीठ
घालावे. बारीक चिरलेली कोथिंबीर घालून कढईवर झाकण ठेवून एक वाफ येऊ द्यावी.
मंद आंचेवर १५ मिनिटे शिजवून घ्या. डाळ नीट शिजली गेली की गॅस बंद करा.
जेवतांना हा बाजरीचा
खिचडा पानांत वाढल्यावर त्यावर वरून लसणाची फोडणी घालून सोबत कांदा द्यावा.
दुधीचे वडे
खास विदर्भीय पध्दतीचे लौकीचे वडे बनवण्या करता प्रथम एक दुधी किसणीने किसून व घट्ट पिळून त्यातील पाणी काढून टाका व मग त्यात हिरवी मिरची ,जिरे,दोन चमचे पांढरे तीळ,एक चमचा ओवा यांचे वाटण करून घाला ,नंतर त्यात थोडीची हळद,बारीक चिरलेला कढीपत्ता , कोथिंबीर आणि मेथीची पाने व अर्धा चमचा साखर घालून व्यवस्थित मिक्स करून घ्या . आता त्यात मावेल तेव्हढेच तांदुळाचे पीठ घालून वडे बनवता येतील असे घट्ट पीठ बनवा.प्लास्टिकचा पेपर किंवा कॉटनच्या ओल्या कापडावर वडे थापून गरम तेलात खमंग टाळून काढा.गरमागरम खुसखुशित दुधीचे वडे तयार.
जास्वंदीच्या फुलांचा आरोग्यदायी चहा
जास्वंदीच्या फुलांचा वापर करून बनविलेला
चहा आपल्या शरीरातील कोलेस्टेरोलची मात्रा नियंत्रित ठेवण्यास लाभकारक आहे.
यामध्ये असलेली पोषक द्रव्ये हृदयनलिकांमध्ये प्लाकपासून तयार होणारा अवरोध
रोखतात. त्यामुळे आपल्या शरीरातील अतिरिक्त कोलेस्टेरोल कमी होण्यास मदत मिळते.
तसेच जास्वंदीची पाने उच्च रक्तदाब असणाऱ्यांसाठी गुणकारी आहेत. जास्वंदीची पाने
पाण्यामध्ये घालून ते पाणी उकळून त्याचे सेवन केले असता, हृदयाची जलद
गती संथ होण्यास सहाय्य मिळून शारीरिक थकवा दूर होतो.
रेसीपी : २ कप पाण्यात जास्वंदीची फुलं आणि त्याची सुकी पानं
टाकावीत. पाणी उकळवावं. पाणी जेव्हा अर्ध राहतं, तेव्हा हे खाली उतरवून गाळून
घ्यावं. त्यानंतर त्यामध्ये लिंबाचा रस आणि काही थेंब मध मिक्स करावा. अशा प्रकारे
जास्वंदीचा स्वादिष्ट चहा तयार होतो. हा चहा दिवसातून २ ते ३ वेळा प्यायल्यास,
तुम्हाला स्वतःलाच तुमच्या शरीरामध्ये फरक जाणवेल. फायदे :
जास्वंदीच्या फुलांचा वापर करून बनविलेला चहा आपल्या शरीरातील कोलेस्टेरोलची
मात्रा नियंत्रित ठेवण्यास लाभकारक आहे. यामध्ये असलेली पोषक द्रव्ये
हृदयनलिकांमध्ये प्लाकपासून तयार होणारा अवरोध रोखतात. त्यामुळे आपल्या शरीरातील
अतिरिक्त कोलेस्टेरोल कमी होण्यास मदत मिळते. तसेच जास्वंदीची पाने उच्च रक्तदाब
असणाऱ्यांसाठी गुणकारी आहेत. जास्वंदीची पाने पाण्यामध्ये घालून ते पाणी उकळून
त्याचे सेवन केले असता, ह्र्रुद्याची जलद गती संथ होण्यास
सहाय्य मिळून शारीरिक थकवा दूर होतो.
टीप : जास्वंदीची फूले कोणत्याही रंगाची असली तरी चालतात .
फुलाचा जो रंग असेल त्या रंगाचा चहा बनेल.
