बटाट्याच्या_चविष्ट_व_खुसखुशीत_पु​ऱ्या

 आज सकाळच्या नाष्ट्याला काय करावे ? असा विचर करतांना फ्रीजमध्ये काय शिल्लक आहे ते पहात असतांना ,दोन उकडलेले बटाटे दिसल्यावर यांचा वापर करुन काहीतरी करावे असे ठरवून ते दोन उकडलेले बटाटे बाहेर काढून ठेवले.

मग त्यांचे पराठे करू या असे म्हणताच पत्नीने सांगितले की गेल्याच आठवड्यात आपण बटाट्याचे पराठे केले होते,तेंव्हा आता दुसरे काहीतरी करू या.

मग थोडा विचार करून अखेर दोघांनी एकमताने ठरवले की ,आज आपण बटाट्याच्या पुऱ्या आणि चटणी करू या.

त्याचीच ही सचित्र रेसिपी येथे शेअर करत आहे.

#बटाट्याच्या_चविष्ट_व_खुसखुशीत_पु​ऱ्या

साहित्य : ३-४ मध्यम आकाराचे बटाटे,एक वाटी चाळलेली कणीक, अर्धी वाटी बेसन पीठ (चणा डाळीचे पीठ), चवीनुसार मीठ,चिमूटभर हळद,एक छोटा चमचा लाल तिखटाची पावडर,एक चमचा जिरे पूड,एक चमचा तीळ,एक छोटा चमचा ओवा,अर्धी वाटी बारीक चिरलेली कोथिंबीर,एक चमचा आले-लसूण-हिरव्या मिरचीचा ठेचा,पाव वाटी ताजे घट्ट मलईचे दही.

कृती : प्रेशरकुकरमधून बटाटे उकडून घ्यावेत.कुकरमधून काढल्यावर सोलून गरम असतानाच बटाट्यांचा पूरणयंत्रावर लगदा करून ठेवा किंवा किसणीवर किसून ठेवा.

एका परातीत हा बटाट्याचा लगदा किंवा कीस घेऊन त्यात कणिक, बेसनपीठ , हळद,लाल तिखटाची पावडर, मीठ ,आले-लसूण-हिरव्या मिरच्यांचा ठेचा, जिरेपूड, तीळ,ओवा,मलईचे घट्ट ताजे दही घालावे व लागेल तसे पाणी घालून पुर्‍यांसाठी घट्ट पीठ मळावे.तेलाचे मोहन घालून पुन्हा मळावे. मुरण्यासाठी १५-२० मिनिटे ओल्या सूती कपड्याने झाकून बाजूला ठेवावे. १५ मिनिटांनी कपडा काढून पुन्हा एकदा पीठाला तेलाचा हात लावून कणिक मळतो तसे मळून घ्यावे. परातीला पीठ चिकटता कामा नये.

या मळून घेतलेल्या पिठाचे लिंबाएव्हढे गोळे करून ठेवावेत. एकेक गोळा लाटून बेताच्या आकाराच्या पुर्‍या लाटून तळावे व आपल्याला आवडत्या लोणचे किंवा, चटणी बरोबर सर्व्ह करा

शिळ्या पोळ्या आणि भात यांचे खुसखुशीत वडे/पुऱ्या

 शिळ्या पोळ्या आणि भात यांचे खुसखुशीत वडे/पुऱऱ्या 

साहित्य : दोन शिळ्या पोळ्या,एक वाटीभर शिळा भात,दीड वाटी बेसन पीठ,अर्धी वाटी तांदूळाची पिठी,दोन डाव भरून थालिपीठाची भाजणी, चवीनुसार लाल तिखट व मीठ,एक चमचा चाट मसाला, अर्धा चमचा आमचूर पावडर, एक चमचा पांढरे तीळ , दोन चमचे तेलाचे मोहन , वडे तळणीसाठी गरजेनुसार तेल. 

कृती : प्रथम कात्रीने पोळ्या चिरून त्यांचे  बारीक  बारीक काप  करून घ्या. एका मोठ्या बाऊलमध्ये भात घेऊन तेलाच्या हाताने भात मोकळा करून घ्या.  त्यात पोळ्यांचे चिरलेले बारीक काप घाला,बेसन पीठ,भाजणी आणि तांदूळाची पिठी घाला. चवीनुसार लाल तिखट पावडर,मीठ घाला. चाट मसाला,आमचूर पावडर,पांढरे तीळ घालुन सगळे चांगले कुस्करून कोरडेच मिक्स करून घ्या. आता त्यात  अर्धी वाटी पाणी घालून दोन चमचे तेलाचे मोहन घालून ,कणिक मळतो तसे घट्ट मळून घ्या. मळतांना मधून मधून गरजेप्रमाणे थोडे थोडे  तेलाचे मोहन घाला. 

खूप मळलेला पिठाचा घट्ट  गोळा छान  मुरण्यासाठी १५ -२० मिनिटे झाकून ठेवा. 

दुसरीकडे गॅसवर एका कढईत वडे तळणीसाठी तेल तापत ठेवा. 

२० मिनिटांनी मुरलेला पिठाचा गोळा पुन्हा एकदा  छान मळून घेऊन त्यांचे लिंबा एव्हढे गोळे बनवून ठेवा. एकेक गोळा  पोळपाटावर पोळ्यांसारखा लाटून त्यातून छोट्या  नैवेद्याच्या वाटीचा वापर करून छोटे छोटे गोल वडे /पुऱ्या कापून  घ्या. 

तेल चांगले कडकडीत तापले असेल तर मध्यम आंचेवर त्या तेलात वडे/पुऱ्या  सोडून गोल्डन सोनेरी रंगावर तळून काढा. 

खुसखुशीत वडे/पुऱ्या लोणी ,गोड दही किंवा कैरीचे लोणचे अथवा खाराची मिरची यांच्या सोबत सर्व्ह करा.जेवणात डावीकडचे तोंडीलावणे  म्हणून सुद्धा हे वडे/पुऱ्या  कामी येतील. 

तोंडली रस्सा ग्रेव्हि पंजाबी भाजी

 तोंडली रस्सा ग्रेव्हि पंजाबी भाजी

 

 

तोंडली  रस्सा ग्रेव्हि पंजाबी भाजीचा मसाला : सूक्के गोटा  खोबरं, शेंगदाणे,धने,लाल सुक्या मिरच्या,भाजलेला कांदा, कोथिंबीर आणि लसणाच्या पाकळ्या मिक्सरवर  वाटुन घ्या. तोंडली चिरून ठेवा.

गॅसवर कढईत तेल गरम झाल्यावर हळद घालून चिरलेली तोंडली व  मीठ घालून कढईत परतुन घ्या.  दोन तीन मिनिटांनी वाटलेला काळा मसाला घालून तेल सुटेपर्यंत परतून घ्या आणि  मसाल्याचा रंग बदलेला दिसला ताजे दही घालून परतून घ्या आणि मग  पाणी घालुन  काढाईवर झाकण ठेवा. उकळी आली की  पाच मिनिटांत तोंडली   मस्त शिजलेली असतील. आता  गॅस बंद करा.

शेंगदाण्याची स्वादिष्ट व कुरकुरीत भजी

 

शेंगदाण्याची कुरकुरीत भजी 

 

 

साहित्य : एक वाटी सालं काढलेले शेंगदाणे,एक छोटी वाटी बेसन पीठ,अर्धा चमचा धने-जिरे पावडर, चवीनुसार हिरव्या मिरचीचा ठेचा,चार लसूण पाकळ्या बारीक चिरून, चिरलेली कोथिंबीर , कढी  पत्त्याची पाने, लाल तिखट ,गोडा मसाला,चवीनुसार मीठ आणि भजी तळणीसाठी आवश्यकतेनुसार तेल.

कृती : प्रथम एका पातेल्यात सालं काढलेले शेंगदाणे, सैंधव मीठ आणि पाणी घ्या व गॅसवर शेंगदाणे मिठाच्या पाण्यात उकडून घ्या. उकडून झाले की चाळणीवर काढून निथळत ठेवा.

शेंगदाण्यातले पाणी  निघून गेले व दाणे कोरडे झाले की मिक्सरच्या भांड्यात टाका. त्यातच धने-जिरे पावडर, हिरव्या मिरचीचा ठेचा,लसूण पाकळ्यांचे बारीक चिरलेले तुकडे,मीठ, लाल टिखट ,गोडा मसाला, कढी  पत्त्याची पाने व चिरलेली कोथिंबीर आणि अर्धी वाटी पाणी  घालून मिक्सरवर वाटून घ्या.

मिक्सरवर वाटलेले शेंगदाण्याचे मसाला वाटण एका बाऊलमध्ये काढून  घ्या आणि त्यात बेसन पीठ घालून मिक्स करा. बाजयाच्या पिठासारखे बनले की  दहा मिनिटे मूरत  ठेवा.

दुसरीकडे गॅसवर एका फ्राय पॅन मध्ये भजी तळण्यासाठी तेल तापायला ठेवा.

मुरलेले शेंगदाणा भज्याचे ओले पीठ (बॅटर) एका दुधाच्या रिकाम्या प्लास्टिकच्या  पिशवीत भरून मेंदीचा असतो तसा कोन बनवा( प्लास्टिकच्या)कोनला / पिशवीला कोपऱ्यात एक बारीक छिद्र पाडा.

पॅन मधील तेल चांगले तापले असेल तर त्या तापलेल्या तेलात  या प्लॅस्टिक कोनमधून हळूहळू  दाब देऊन जिलबीचे पीठ घालतो तशी भजी सोडा आणि सोनेरी रंगावर तळून काढा.

टोमॅटो सॉस किंवा ओल्या खोबऱ्याच्या हिरव्या चटणी सोबत ही स्वादिष्ट व कुरकुरीत शेंगदाण्याची भजी सर्व्ह करा.

 

 

 

ब्रेड रवा व पोहे यांचा मिश्र उपमा

 

ब्रेड रवा व पोहे यांचा मिश्र उपमा 

 

 

साहित्य : एक बेडचा स्लाइस, एक छोटी वाटी रवा,अर्धी मूठ जाड (कांदा-पोह्याचे) पोहे , एक कांदा (चिरून),एक टोमॅटो फोडी करून,चवीनुसार तिखट,मीठ ,चवीपुरती साखर,दोन चमचे लिंबाचा रस,कढीपत्ता,चिरलेली कोथिंबीर,फोडणीसाठी तेल व तूप,फोडणीचे साहित्य -हळद,हिंग,मोहरी,जिरे पूड,धने पूड,कढीपत्त्याची पाने.

कृती : प्रथमपोहे भिजत घालून ठेवा. नंतर  गॅसवर मंद आंचेवर एका कढईत तेल व तूप यांच्यावर रवा सोनेरी रंगावर भाजल्याचा खमंग व सुवास येईपर्यंत भाजून घ्या. नंतर त्याच कढईत रव्याच्या चारपट पाणी गरम करायला ठेवा. त्या पाण्यात चवीनुसार तिखट व मीठ घाला. चविपुरती साखर व दोन चमचे लिंबाचा रस घाला.  पाण्याला उकळी आली की त्या कढईत पावाचा स्लाइस सोडा आणि उलथण्याने पांवाहे बारीक तुकडे कौन घोंटून  घ्या. पावाचा लगदा झाला की त्यातह भाजून हेवलेला रवा घाला  आणि कलथ्याने हलवत रंहा. रवा-पाव चांगले मिक्स झाले की भजत ठेवलेले पोहे घालून कलथ्याने हलवत मिक्स करून घ्या. काढाईवर झाकण ठेवून झाकणात पाणी घालून चांगली वाफ काढून घ्या .

दुसरीकडे गॅसवर एका काढल्यात तेल-तुपाची फोडणी करून घ्या फोडणीत हळद-हिंग,मोहरी,जिरे-धने पूड, कढीपत्त्याची पाने घालून ती तडका फोडणी कढईतील पाव-रवा-पोहे यांच्या मिश्रणावर ओता. कलथ्याने खालीवर हलवून मिक्स करून घ्या . वर चिरलेली कोथिंबीर घालून झाकण ठेवून एक वाफ काढून घ्या.

तुमचा ब्रेड रवा व पोहे यांचा मिश्र उपमा सर्व्ह करायला तयार आहे.

 

बागेसाठीआवश्यक कुंड्यांबाबत माहिती

 

कुंडी : कुंडी म्हणून कुंभार वाड्यात  मिळणार्‍या मातीच्या अगर बाजारात विकत मिळणाऱ्या 

प्लास्टिकचा विविध  आकाराच्या आकर्षक कुंड्या, सिरामीकच्या आकर्षक व विविध आकारात बाजारात

 उपलब्धअसलेल्या कुंड्या,पत्र्याचे  गोल, चौकोनी आकारातील डबे,ड्रम्स,प्लास्टिकचे

 डबे,ड्रम्स,थर्मोकोलचे अगदी लहान आकारा पासून मोठ्या आकारा पर्यन्त हवे तसे मिळू शकणारे चौकोनी किंवा  आयताकृती  खोके काहीही चालू शकते.

माझ्या मते थर्मोकोलचे आपल्याला हवे त्या साईजचे आयताकृती आकाराचे खोके कुंडी म्हणून सर्वात उत्तम !

 आजकाल मेडीकलच्या डिस्ट्रिब्युटरकडून / दुकानातून असे रिकामे खोके मिळू शकतात. 

  थर्मोकोल वजनाने खूपच हलके असल्याने ज्येष्ठ व्यक्तींना या कुंड्या बागेत हाताळणे अतिशय सोपे

 जाते हे एक महत्वाचे कारण व दुसरे असे की थर्मोकोल हे पाण्याने सडत आगर कुजत नाही,किंवा

 याचेवर कसलाही रासायनिक अगदी अ‍ॅसिडचाही परिणाम होत नाही.त्याला पाण्याचा निचरा 

 होण्यासाठी ण्यासाठी भोके पाडणे सुद्धा सहज व सोपे जाते . साधा लोखंडी खिळा किंवा स्क्रू ड्रायव्हर  वापरुन भोके पाडता येतात. 

  

कुळीथ पिठाच्या पौष्टिक व स्वादिष्ट वड्या

कुळीथ पिठाच्या पौष्टिक व स्वादिष्ट वड्या

साहित्य : अर्धी वाटी कुळीथाचे पीठ,दोन टेबलस्पून कणिक,एक टेबलस्पून बेसन पीठ,अर्धी वाटी साजूक तूप,एक पूर्ण पिकलेले केळे,एक वाटी किसलेला गुळ ,एक वाटी ओल्या नारळाचा चव,एक छोटा चमचा वेलची पूड,एक चमचा खसखस,१०-१२ बेदाणे व १०-१२ काजू पाकळी

कृती : एका नॉनस्टिक पॅन मध्ये साजूक तुपावर अर्धी वाटी कुळीथाचे पीठ ,दोन चमचे कणिक आणि एक चमचा बेसन पीठ खमंग सुवास येईपर्यंत भाजून घ्या.

त्याच पॅनमध्ये थोड्याशा साजूक तुपात १०-१२ बेदाणे व १०-१२ काजू पाकळी परतून घ्या.

आता त्याच पॅनमध्ये ओल्या नारळाचा चव,किसलेला गूळ आणि कुस्करलेले पिकलेले केळे घालून खमंग परतून / शिजवून घ्या. शिजत असतांनाच त्यात खसखस व वेलची पूड घाला. एक छोटा चमचा मीठ घाला. या मिश्रणातच तुपावर परतलेले १०-१२ बेदाणे व १०-१२ काजू पाकळी घालून मिक्स करून घ्या.

गॅस बंद करून त्यात खमंग भाजलेली कुळीथ पीठ,कणिक आणि बेसन पीठ घालून कलथ्याने मिक्स करून घ्या.

एका स्टीलच्या थाळ्याला आतील बाजूने सगळीकडे साजूक तुपाचा हात चोळून घेऊन त्यात हे मिश्रण ओता व सगळीकडे सारख्या जाडीत पसरा.

सुरीला दोन्हीकडे तुपाचा हात लावून आपल्याला हव्या त्या आकारात वड्या कापून ठेवा.

थाळ्यातील वड्या थंड व घट्ट झाल्यावर सूरीच्या सहाय्याने वड्या थाळ्यातून काढून घट्ट झाकणाच्या डब्यात भरून ठेवा.

थंडीत रोज सकाळी या स्वादिष्ट व पौष्टिक वड्या खाव्यात.