शंकरपाळी

साहित्य : १ वाटी चाळलेला मैदा , १ वाटी चाळलेली कणीक , १वाटी दूध , १/२ वाटी पाणी , १/२ वाटी लोणी , १/२ वाटी साखर , ३-४ मोठे चमचे तांदळाची पिठी , चिमूटभर खाण्याचा सोडा व चिमूटभर मीठ , तळण्यासाठी रिफाईंड तेल

कृती : एका भांड्यात १वाटी दूध व १/२ वाटी पाणी एकत्र करून मिश्रण चांगले ढवळा व बाजूला ठेवा.

 १/२ वाटी लोणी व १/२ वाटी साखर एकत्र करून मिश्रण चांगले फेटून घ्या ते हलके व फुगल्यावर त्यात चिमूटभर खाण्याचा सोडा व चिमूटभर मीठ घालून पुन्हा एकदा चांगले फेटून घ्या व नंतर त्यात १ वाटी चाळलेला मैदा , १ वाटी चाळलेली कणीक , ३-४ मोठे चमचे तांदळाची पिठी व एकत्र केलेले दूध व पाणी घाला व चांगले मळून घ्या.

त्याचे सारख्या आकाराचे ३-४ गोळे करून ठेवा व नंतर एकेक गोळा जाडसर पोळीप्रमाणे लाटून कातण्याने शंकरपाळी कापून घ्या व ती शंकरपाळी उकलत्या तेलात/तुपात सोनेरी रंगावर तळून घ्या. गार झाल्यावर घट्ट झाकणाच्या स्टीलच्या डब्यात भरून ठेवा.

पाणीपुरी,बटाटापुरी,दहिपुरी,शेवपुरी,रगडापुरी,आलू चाट

पाणीपुरी

साहित्य व प्रमाण : पुदिना १ ते २ जुडया.कोथिंबीर १ जुडी,हिरव्या मिरच्या ४ ते ५,आले एक तुकडा,कढीपत्ता ५/६ पाने, खजूर २५० ग्राम,चिंच  २५० ग्राम,गूळ २५० ग्राम, छोले/काबुली चणे २५० ग्राम,पांढरा वाटाणा २५० ग्राम,धने व जिरे पावडर (प्रत्येकी १ मोठा कोशिंबीरीचा चमचाभर),शेंदेलोण व पादेलोण (प्रत्येकी १ चमचा),पाणीपुरी तयार मसाला १०० ग्राम,चाट मसाला १०० ग्राम,काळे मिरे २/३,लाल तिखट १ चमचा, मीठ १ चमचा,साखर २ मोठे चमचे, बारीक शेव ५०० ग्राम,मध्यम आकाराचे बटाटे ७/८,गोड दही ५०० ग्राम,फुगलेल्या व कडक चपट्या पाणीपुरी व रगडापुरीच्या तयार पुर्‍या (सरसकट माणशी १५ नग प्रमाणे)    

पाणीपुरीचे पाणी तयार करण्याची कृती : चिंच व खजूर (बिया काढून)आणि गूळ किमान ५ ते ६ तास पाण्यात भिजत घालून ठेवावेत व नंतर मिक्सर मधून फिरवून व गाळून घ्यावे. पांढरा वाटाणा व छोले/काबुली चणे ४ / ५ तास पाण्यात भिजत घालून नंतर ते शिजवून व बटाटे उकडून घ्यावेत.पुदिना निवडून व स्वच्छ धुवून घ्यावा व मिक्सर मधून फिरवून व पाणी घालून गाळून घ्यावा. एका मोठ्या पातेल्यात मिक्सरमधून फिरवून व नंतर गाळून घेतलेले चिंच,खजूर,गूळ व पुदिना ह्याचे पाणी एकत्र करावे व त्यात चवीप्रमाणे वाटलेले आले,हिरवी मिरची,पाणीपुरी मसाला,चाट मसाला,मिरेपूड,जिरे व धने पावडर,लाल तिखट,शेंदेलोण,पादेलोण,मीठ,बारीक चिरलेली कोथिंबीर,बारीक चिरलेला कढीपत्ता,साखर (चवीसाठी) इ. घालून मिश्रण चांगले ढवळत राहावे.    

आलू चाट

साहित्य : ४ -५ उकडलेले माध्यम आकाराचे बटाटे, १ कांदा, १ टोमॅटो, १ लिंबू, चाट मसाला,तिखट- साखर-मीठ चवीनुसार,चिंचेची चटणी,बारीक शेव,बारीक चिरलेली कोथिंबीर
कृती : उकडलेल्या बटाटयाच्या मध्यम फोडी कराव्यात. कांदा व टोमॅटो चिरुन घ्यावेत. मोठया बाऊलमध्ये सर्व एकत्र करावे, चवीनुसार चाट मसाला, तिखट,मीठ, साखर घालून लिंबू पिळून चांगले कालवावे. वर चिंचेची आंबट-गोड चटणी व बारीक्षेव आणी बारीक चिरलेली कोथिंबीर घालून फ्रीजमध्ये थोडावेळ थंड करायला ठेवून मग खायला घ्यावे.


 

-

मेथी मलई मटर पनीर

साहित्य : २ कोवळ्या ताज्या मेथीच्या जुडया(निवडून,स्वच्छ धुवून व चिरून),१०० ग्राम खवा,२०० ग्राम फ्रेश क्रीम,१ कप दूध,२०० ग्राम हिरवा मटार,१०० गाम पनीरचे छोटे छोटे तुकडे २ मोठे कांदे (बारीक चिरून),१ मोठा चमचा टोमॅटो प्यूरी,छोटा अर्धा चमचा गरम मसाला, छोटा अर्धा चमचा हळद,२ मोठे चमचे तेल,चवीनुसार मीठ

कृती : ओला हिरवा मटार व बारीक चिरलेली मेथी सळसळत्या उकळत्या पाण्यात २ मिनिटे घालून उपसून घ्या. एका कढईत तेल घालून गॅसवर ठेवा व त्यात बारीक चिरलेला कांदा घाला व सोनेरी गुलाबी रंगावर परतून घ्या नंतर त्यात हळद घालून हलवा,मग त्यात प्रथम मटार घालून हलवा व नंतर खवा कुस्करून घाला व हलवा ,नंतर टोमॅटो प्युरी घालून हलवा व अखेरीस दूध घाला व शिजवत ठेवा. १-२ उकळ्या येऊन गेल्यावर त्यात उकळत्या पाण्यातून काढून घेतलेली मेथी घालून २-३ मिनिटे शिजवूत घेतल्यावर गरम मसाला घालून हलवा व कढई खाली उतरवून ५ मिनिटे झाकून ठेवा॰

सर्व्ह करतेवेळी फेटलेले फ्रेश क्रीम घालून सर्व्ह करा. 

एराप्पे

साहित्य : २ वाट्या उकडे तांदूळ, १ वाटी उडदाची डाळ, १ मोठा कांदा बारीक चिरून , १ मोठा आल्याचा तुकडा बारीक चिरून, आवडीनुसार ३ -४ हिरव्या मिरच्या बारीक चिरून, मीठ चवीनुसार, फोडणीसाठी तेल, मोहरी, हिंग व बारीक चिरलेला कढीपत्ता 

कृती : प्रथम २ वाट्या उकडे तांदूळ, १ वाटी उडदाची डाळ वेगवेगळे १०-१२ तास भिजवणे. मग दोन्ही वेगवेगळे वाटून स्टीलच्या मोठ्या पातेल्यात एकत्र करून उबदार ठिकाणी पीठ फुगण्यासाठी / आंबवण्यासाठी १०-१२ तास झाकून ठेवावे.

दुसरे दिवशी तयार इडली पीठात बारीक चिरलेला कांदा, आले, हिरवी मिरची व चवीनुसार मीठ घालावे.` एका काढलीत तेल तापवून मोहरी, हिंग व कढीपत्त्याची फोडणी करावी व ती पीठावर ओतून मिश्रण नीट एकजीव करावे.निर्लेपचे आप्पेपात्र मध्यम आचेवर गॅसवर ठेवून त्यात १/२ चमचा  तेल घालावे. तेल तापले की त्यात चमच्याने मिश्रण घालावे. झाकण ठेऊन २ मिनिटे शिजू द्यावे. एका बाजूने शिजून फुगले की उलटवून दुसर्‍या बाजूने शिजू द्यावे. तयार आप्पे ओल्या नारळाच्या चटणीबरोबर सर्व्ह करावे.

झटपट सोलकढी

साहित्य : घट्ट दही,दूध,पाणी,कोकण आगळ,साखर,मीठ,आले,मिरच्या,कोथिंबीर,४-५ कढीपत्याची पाने,धने-जिरे पूड,स्ट्रौबेरी खाण्याचा रंग   

कृती : प्रथम मिक्सरच्या द्रव पदार्थासाठीच्या भांड्यात १मोठा कप घट्ट दही,१-१/२ते २ कप दूध,१/२ कप कोकण आगळ व पाणी,चवीप्रमाणे साखर व मीठ घालून फिरवून घ्या व एका मोठ्या स्टीलच्या उभ्या आकाराच्या गंजात काढून नंतर त्यात मिक्सरच्या छोट्या भांड्यातून आल्याचा एक छोटा तुकडा,लसणाच्या ४-५ पाकळ्या,चवीप्रमाणे २-३ मिरच्या,धने-जिरे पावडर,थोडी चिरलेली कोथिंबीर व ४-५ कढीपत्याची पाने ह्यांचे वाटण करून घेऊन ते वाटण आणी ५-६ थेंब स्ट्रौबेरी खाण्याचा रंग घालून एकजीव होईपर्यंत ढवळून घ्या व काचेच्या ग्लासमधून सर्व्ह करतेवेळी सजावटीसाठी वरुण थोडी बारीक चिरलेली कोथिंबीर घाला.    

Time-lapse at Yercaud Lake - Shot using Samsung Galaxy Note 2

दोडक्यांच्या शिरांची चटणी

दोडक्यांच्या शिरांची चटणी

साहित्य : कोवळे दोडके २५० ग्राम,पांढरे तीळ व शेंगदाण्याचे कूट प्रत्येकी दोन मोठे (कोशिंबीरीचे) चमचे,मीठ,साखर व लाल तिखट चवीपुरते,कढीपत्ता ५-६ पाने,थोडीशी बारीक चिरलेली कोथिंबीर,१०-१२ थेंब लिंबाचा रस,गोडे तेल,हळद,हिंग व मोहोरी इ.फोडणीचे साहित्य

कृती : प्रथम किसणीवर कोवळा गोड दोडका किसून घेऊन दोडक्याच्या शिरा काढून घ्याव्यात व एका ताटात पसरून ठेऊन उन्हात चांगल्या वाळवून घ्याव्यात.  निर्लेपचे फ्राय पॅनमध्ये फोडणीसाठी गोडे तेल घेऊन गॅसवर तापत ठेवावे.तेल चांगले कडकडीत तापल्यावरच त्यात मोहोरी,हिंग,हळद,कढीपत्त्याची पाने,बारीक चिरलेली कोथिंबीर घालून त्यानंतर वाळवलेल्या दोडक्याच्या शिरा,चवीपुरते लाल तिखट,मीठ,साखर,पांढरे तीळ व शेंगदाण्याचे कूट घालावे व चांगले परतून घ्यावे.नंतर ते गरम असतानाच त्यावर लिंबाच्या रसचे १०-१२ थेंब टाकून हालवून घ्यावे.तयार चटणीवर पुन्हा एकदा थोडी बारीक चिरलेली कोथिंबीर व चिमूटभर साखर घालून हलवावी व सर्व्हिंग बाऊलमध्ये काढून ठेवावी.ही चटणी अत्यंत रुचकर व चविष्ट लागते.