ब्रेड अनियन उत्तप्पा

ब्रेड अनियन उत्तप्पा 

साहित्य : ब्रेडचे पाच-सहा स्लाइस, पअर्धी वाटी जाड रवा , चार टेबलस्पून तांदूळाची पीठी , अर्धा ते पाऊण  वाटी दही,एक चमचा मीठ , एक छोटा चमचा जिरे , एक छोटा चमचा काळी मिरी पूड (ऐच्छिक) , एक वाटी बिया काढून अगदी बारीक चिरलेल्या टोमॅटोच्या फोडी, एक गाजर (किसून) , दोन बारीक चिरलेल्या हिरव्या मिरच्या , दोन चमचे किसलेले आले , गरजेनुसार  तेल

कृती  : सुरुवातीला ब्रेडच्या स्लाइसच्या कडा काढून टाका आणि  त्यांचे छोटे तुकडे करून घ्या. मिक्सरच्या मोठ्या भांड्यात ब्रेडचे तुकडे, रवा,  तांदूळाची पीठी, मीठ, दही व पाणी घालून वाटून पेस्ट बनवून घ्या.

एका मोठ्या बाउलमध्ये ही पेस्ट काढून घेऊन त्यात थोडेसे पाणी घालून उत्तप्याचे पीठ बनवा.(पीठ फार पातळ अथवा फार घट्ट नसावे)

मग त्यात जिरे, बारीक चिरून ठेवलेल्या  टोमॅटोच्या फोडी , किसलेले गाजर, किसलेले आले, बारीक चिरून ठेवलेल्या हिरव्या मिरच्या घालून मिक्स करून घ्या.

गॅसवर मध्यम आचेवर तवा गरम करून घेऊन त्यावर चमच्याने थोडेसे तेल सोडून त्यावर अर्धा कांदा किंवा कच्चा बटाटा तवाभर फिरवून मग हाताने तव्यावर थोडेसे पाणी शिंपडा आणि सुती कपड्याने तवा पुसून घ्या व तव्याला सगळीकडे तेल लावून घ्या.
दोन डाव पीठ तव्यावर घालून सगळीकडे गोल फिरवत पसरून घ्या. आता त्यावर बारीक चिरलेला कांदा आणि कोथिंबीर सगळीकडे पसरून घाला.

चमच्याने उत्तप्याच्या सगळ्या कडेने तेल सोडा व दोन मिनिटे भाजून घेऊन पलटी करा व दोन्ही बाजूंनी गोल्डन ब्राऊन रंगावर भाजून घ्या. (आंच मध्यमच ठेवा, मोठी आंच ठेवल्यास उत्तप्पा आतपर्यंत शिजणार नाही व आतून काच्चाच राहील). याच पद्धतीने उर्वरीत उत्ताप्पा बनवा.

कोणत्याही आवडत्या चटणी सोबत (खोबर्‍याची चटणी किंवा कोथिंबीरीची हिरवी चटणी) किंवा टोमॅटो सॉस बरोबर गरम उत्तप्पा सर्व्ह करा.