Saturday, 13 August 2016

उपवासाच्या पुरणपोळ्या



उपवासाच्या पुरणपोळ्या

साहित्य : २-३ मध्यम आकाराचे उकडलेले बटाटे,एक वाटीभर साजूक तूप,दोन वाट्या राजगिरा पीठ ,एक वाटी साखर , प्रत्येकी १०-१२ बदाम व काजूचे काप , एक छोटा चमचा वेलची पूड, दोन छोटे चमचे तेल.
कृती : उकडलेले बटाटे सोलून व चांगले कुस्करून (मॅश) घ्यावेत.एका कढईत थोडेसे साजूक तूप गरम करावे.त्यात कुस्करलेला बटाटा घालून साधारण १० मिनिटे चांगला खरपूस परतून घ्यावा.परतत असताना खाली लागणार नाही याची काळजी घ्यावी.बटाटा परतल्याने त्याला ब्राऊन रंग आला की त्यात साखर, बादाम व काजूचे काप, वेलची पूड घालून पुरण बनवून घ्यावे व थोडे थंड होऊ द्यावे.राजगिरा पिठात २ छोटे चमचे तेल व आवश्यकतेनुसार थोडेसे पाणी घालून छान नरम पीठ मळुन घ्यावे.या पीठाचे एकाच आकाराचे गोळे करून घ्यावे.या गोळ्याची पुरीच्या अकाराची पारी लाटून घ्यावी.
या पुरीची बोटांच्या साह्याने द्रोण/वाटी तयार करून घ्यावी.या द्रोणावर थोडे पुरण ठेवावे व पारीच्या सर्व बाजू बंद कराव्या व हा गोळा राजगिर्‍याच्या पीठात घोळून घ्यावा.पोळपाटावर गोल पोळी लाटून घ्यावी.
तवा गरम करून अगदी हलक्या हाताने लाटून घेतलेली पोळी त्यावर घालावी.दोन्ही बाजुनी थडे तूप सोडून खरपुस भाजून घ्यावी. तव्यावर पोळीच्या आजूबाजूने साजूक तुपाची धार सोडावी.
गरमा गरम सर्व्ह करावी.