#कांदा_काकडी_कैरीचा_चटकदार_तक्कू
गुढी पाडव्याच्या सुमारास मंडईत कच्च्या कैऱ्या येण्यास सुरवात झालेली असते. भाव जरा जास्तच असतात.
मी सोबतच्या फोटोत दाखवलेली कैरी घेतली त्याला रु.५०/-मोजावे लागले.तर फोटोत दाखवलेली तवस खिरा काकडी रु.३०/- ला मिळाली.
करी आणि काकडी दोन्हीही इतकी महाग असूनही मला ‘तक्कू’ ची जबरदस्त याद आलेली असल्याने महागाईकडे काना-डोळा करून मी कच्ची कैरी व काकडी. दोन्ही घेतल्या.
त्याचीच सचित्र रेसीपी येथे शेअर करत आहे.
आंबट गोड तिखट चटकदार चवीचा नवीन पदार्थ ,'कांदा-काकडी-कैरीचा चटकदार तक्कू'
साहित्य- एक कैरी, एक काकडी, एक कांदा , दोन चमचे लाल मिरचीचे तिखट, एक चमचा मोहरी, अर्धा चमचा हळद, पाव वाटी तेल, चवीनुसार मीठ ,किसलेला गूळ व साखर.
कृती- कैरी व काकडी दोन्हींची साले काढून किसून घ्या. त्यात कांदा सोलून व किसून घाला. तेल गरम करून त्यात मोहरीची फोडणी घालून मंद आचेवर हळद, तिखट तळून घ्या व हे तळलेली फोडणी किसलेल्या कैरी, काकडी, कांदा यांच्या किसावर घाला. चवीनुसार लिंबाचा रस,गूळ,साखर व मीठ घालून मिक्स करा. झटपट चटकदायर तक्कू तयार!
