Saturday 28 April 2018

#बटाटा पुर्‍या

#बटाटा पुर्‍या


साहित्य : ३-४ मध्यम आकाराचे बटाटे,एक वाटी कणीक,एक वाटी ज्वारीचे पीठ,अर्धी वाटी बेसन (चणा डाळीचे पीठ),दोन टेबलस्पून तांदूळाची पिठी,चवीनुसार मीठ,चिमूटभर हळद,एक छोटा चमचा लाल तिखटाची पावडर,एक चमचा जिरे पूड,एक चमचा तीळ,एक छोटा चमचा ओवा,अर्धी वाटी बारीक चिरलेली कोथिंबीर,एक चमचा आले-लसूण-हिरव्या मिरचीचा ठेचा,पाव वाटी ताजे घट्ट मलईचे दही.
कृती : प्रेशरकुकरमधून बटाटे उकडून घ्यावेत.कुकरमधून काढल्यावर सोलून गरम असतानाच बटाट्यांचा पूरणयंत्रावर लगदा करून ठेवा किंवा किसणीवर किसून ठेवा.
एका परातीत हा बटाट्याचा लगदा किंवा कीस घेऊन त्यात कणिक,ज्वारीचे पीठ,बेसन,तांदूळाची पिठी,हळद,लाल तिखटाची पावडर, मीठ ,आले-लसूण-हिरव्या मिरच्यांचा ठेचा, जिरेपूड, तीळ,ओवा,मलईचे घट्ट ताजे दही घालावे व लागेल तसे पाणी घालून पुर्यां साठी घट्ट पीठ मळावे.तेलाचे मोहन घालून पुन्हा मळावे. १५-२० मिनिटे ओल्या सूती कपड्याने झाकून बाजूला ठेवावे. १५ मिनिटांनी कपडा काढून पुन्हा एकदा पीठाला तेलाचा हात लावून कणिक मळतो तसे मळून घ्यावे. परातीला पीठ चिकटता कामा नये.
या मळून घेतलेल्या पिठाचे लिंबाएव्हढे गोळे करून ठेवावेत. एकेक गोळा लाटून बेताच्या आकाराच्या पुर्याो लाटून तळावे व आपल्याला आवडत्या लोणचे किंवा, चटणी बरोबर सर्व्ह करा

Friday 27 April 2018

#नाकारडे

#नाकारडे


साहित्य : दोन काकड्या,हिंग, चवीनुसार सैंधव मीठ,हिरवी मिरची,लवंगा, दालचिनीचा तुकडा,काळे मिरे,जिरे,सुंठ पावडर , मोहरी,५-६ पाकळ्या लसूण,अर्धी वाटी मलईचे घट्ट दही
कृती : काकड्यांची साले काढून, काकड्या किसून घ्या.आता हा कीस राजापुरी पंचावर टाकून, पंचा गुंडाळून चक्क कपडा पिळल्या सारखा घट्ट पिळून घ्या.जमेल तेव्हढे पाणी काढून टाका.
वरील सर्व मसाले, मोहरी, सुंठपावडर , लवंग दालचिनी , जिरे मिरे, यांची मिक्सरवर छान पावडर करून घ्या.
एकदा बारीक झाले की मग त्यातच लसूण व मिरची घालून परत एकदा मिक्सर वर वाटून घ्या. हळद,हिंग, सैंधवमीठ मिसळा.
आता हे सर्व काकडीच्या किसात मिसळून छान एकत्र करा. त्यात घट्ट दही मिक्स करा. झाले तुमचे चविष्ट असे तोंडीलावण तय्यार !
मोहरीच्या उग्रपणामुळे हे 'नाकारडे' खाताना नाकातून अक्षरश: सुं सुं पाणी सुरु होत. सर्दी पडश्यावर एकदम नामी उपाय !! झटकन जाम झालेलं डोकं एकदम हलक होत.
घरात फ्रीज नसलेल्या काळातही हे 'नाकारडे’ सहज महिनाभर मडक्यात राहायचं अन् टिकायच सुद्धा.
आतातर मी चक्क बरणीत भरून फ्रीजमध्ये ठेवून दोन-तीन महिने मनसोक्त चाखत राहातो.
टीप : या नाकरड्याला वह्राडात कुरमुडे असे म्हणतात.

Wednesday 18 April 2018

#नवलकोलचा हलवा

#नवलकोलचा हलवा


साहित्य :एक गड्डा कोवळा नवलकोल,साजूक तूप एक डाव,साखर एक वाटी, दूध एक कप,खवा १०० ग्रॅम,बेदाणे ,काजू पाकळ्या,केशराच्या चार काड्या.
कृती : नवलकोलची साले काढून किसून व मायक्रोवेवहमध्ये वाफवून घ्या. गॅसवर एका कढईत तूप तापवून घेऊन त्यात वाफावलेला नवलकोलचा कीस घालून सोनेरी रंगावर परतून घ्या व दूध घालून शिजवा. कीस शिजला की खवा घालून परता. आता साखर घालून परता. खवा व साखर एकजीव झाले व कीस घट्ट होत आला की त्यात केशर,काजू पाकळ्या व बेदाणे घालून उलथण्याने हालून एक वाफ काढून गॅस बंद करा.
जेवणानंतर स्वीट डिश म्हणून सर्व्ह करा.  




Friday 13 April 2018

चटपटे सोया क्रंच

चटपटे सोया क्रंच





साहित्य : १५-२० सोयाबीन चंक्स , एक ढोबळी (सिमला) मिरची , अर्धी वाटी हिरव्या मटारचे दाणे , एक मोठा टोमॅटो बारीक चिरून , एक मोठा कांदा बारीक चिरून , चवीनुसार हिरव्या मिरचयांचे तुकडे व मीठ , एक चमचा आले-लसूण पेस्ट , अर्धा चमचा प्रत्येकी धने-जिरे पावडर , आधा चमचा लिंबाचा रस , अर्धा चमचा चाट मसाला , बारीक चिरलेली कोथिंबीर , पनीरचे ८-१० बारीक तुकडे.

कृती :  सोया चंक्स धुवून घ्या व चिमूटभर मीठ घालून प्रेशर  कुकरमधून शिजवून घ्या . कुकरमधून शिजवून घेतल्यावर हाताने दाबून पाणी काढून टाका व बाजूला ठेवा. गॅसवर एका कढईत फोडणीसाठी तेल गरम करून घेऊन त्यात जिरे,हळद व हिंग घालून एक मिनिट फोडणी परतून घेऊन मग त्यात कांदा घालून पुन्हा पांच मिनिटे परतून घ्या. मग आले-लसूण पेस्ट व धने-जिरे पावडरव चाट मसाला  घालून पुन्हा दोन मिनिटे परता. कांद्याचा रंग सोनेरी झाला की त्यात बारीक चिरलेला टोमॅटो ,बारीक चिरलेली ढोबळी सिमला मिरची , पनीरचे बारीक तुकडे व हिरवे मटाराचे दाणे घालून  शिजवून घ्या. शेवटी लिंबाचा रस व चवीनुसार मीठ घाला. गॅस बंद करून वर बारीक चिरलेली कोथिंबीर घालून पांच मिनिटे झाकून ठेवा.


Monday 9 April 2018

चटकदार क्रिप्सी मटकी भेळ



साहित्य : सोलापुरी चुरमुरे (मुरमुरे), शेव, पापडी, खारीबुंदी, शेंगदाणे,एक मोठा बारीक चिरलेला  कांदा, एक मोठ्या आकाराचा बारीक चिरलेला टोमाटो, एक  छोटी काकडी (किसून) , चवीनुसार बारीक चिरून हिरव्या मिरच्या , एक वाटी वाफवलेली मोड आलेली मटकी,मूठभर बारीक चिरलेली कोथिंबीर , अर्धी लिंबाची फोड , कांद्याच्या फोडी.
कृती : सोलापुरी चुरमुरे, शेव, पापडी, खारीबुंदी, शेंगदाणे हे सगळे पदार्थ एका मोठ्या आकाराच्या स्टीलच्या थाळ्यात किंवा परातीत  एकत्र केले जातात. स्टीलच्या थाळ्यात किंवा परातीत  हे सगळे पदार्थ एकत्र करतानाच मधल्या भागात शेव, पापडी, खारीबुंदी, तळलेले शेंगदाणे हे पदार्थ जास्त राहतील आणि प्लेटच्या कडेने चुरमुरे येतील, असे बघितले जाते.
दुसरीकडे गॅसवर मोठ्या पातेल्यात मोडाची मटकीचा झणझणीत रस्सा उकळत ठेवलेला असतो. भेळ सर्व्ह करतेवेळी प्लेटमधील फरसाण असलेल्या भागावर डावभर उकळत ठेवलेला गरमागरम मटकीचा झणझणीत रस्सा टाकला जातो. त्यानंतर त्यावर कांदे-लसणाचा मसाला पेरून पुन्हा थोडी शेव टाकली जाते. पातल्यातील मटकीचा झणझणीत रस्सा यांचा आणखी एक थर भेळेवर टाकल्यानंतर त्यावर कोथिंबीर, लिंबाची फोड , उकडलेली मिरची आणि चिरलेला कांदा यांच्यासह ती सर्व्ह करा.

Sunday 8 April 2018

शेवग्याच्या पानांचे थालीपीठ

शेवग्याच्या पानांचे थालीपीठ


साहित्य : दोन वाट्या शेवग्याची कोवळी पाने , एक वाटी भिजलेले जाड पोहे,एक मोठा बारीक चिरलेला कांदा, ३-४ बारीक चिरलेल्या लसूण पाकळ्या, चवीनुसार तिखट,मीठ,जिरेपूड,दोन चमचे दही,जरुरीनुसार ज्वारीचे पीठ  आणि दोन टेबलस्पून बेसन पीठ, ,अर्धा डाव तेल  
कृती : प्रथम जाड पोहे भिजत घालून ठेवा आणि दुसरीकडे एका तसराळ्यांत शेवग्याची कोवळी पाने घ्या,त्यांत  २-३ बारीक चिरलेल्या लसूण पाकळ्या, चवीनुसार तिखट,मीठ,जिरेपूड,दोन चमचे दही घालून कोरडेच मिक्स करून घ्या , आता त्यांत भिजलेले पोहे आणि बारीक चिरलेला कांदा घालून व्यवस्थित मिक्स करून घ्या,मग त्यांत जरुरीनुसार ज्वारीचे पीठ  आणि बेसनाचे इथ व आवश्यक तेव्हढेच पाणी घालून थालीपीठाचे पीठाचा गोळा करून १० मिनिटे झाकून ठेवा.
१० मिनिटानंतर तव्यावर थोडे तेल घालून थालीपीठ लावा,बोटाने मध्यभागी एक व त्याच्या बाजूला ४ भोके पाडून त्यांत चमच्याने थोडे थोडे तेल सोडून तवा गॅसवर ठेऊन मंद आंचेवर दोन्ही बाजूंनी थालीपीठ नीट भाजून घ्या.
डिशमधून एका वाटीत लोणी किंवा दही अगर खाराच्या मिरच्या किंवा लोणचे घालून गरम थालीपीठ सर्व्ह करा. न्याहारीसाठी अतिशय पौष्टिक , रुचकर व स्वादिष्ट  असे हे शेवग्याच्या पानांचे थालीपीठ.मधुमेहयांनी शेवग्याची पाने जरूर खावीत.


मिश्र डाळींचा “अडई” डोसा

मिश्र डाळींचा “अडई डोसा



अडई डोसा हा एक दाक्षिणात्य डोसा प्रकार आहे.हा खास करून तामिळनाडू राज्यात जास्त प्रमाणात केला जातो.अतिशय पौष्टीक असा हा डोसा करायला फारच सोपा आहे व बिघडण्याचा धोका कमी.
साहीत्य  : दोन वाट्या जाड तांदूळ ,एक वाटी उडदाची डाळ,प्रत्येकी अर्धी वाटी चणा डाळ,तुरीची डाळ,मुगाची डाळ व मसुराची डाळ, चवीनुसार ४-५ लाल सुक्या ब्याडगी मिरच्या ,एक चमचा मेथी दाणे,मूठभर बारीक चिरलेला  कांदा व कोथंबिर,एक इंच आल्याचा तुकडा  बारीक चिरून,१०-१२ कढीपत्याची पाने बारीक चिरून,चवीनुसार मीठ व जरुरीप्रमाणे तेल

कृती  : सगळ्यात आगोदर जाड तांदुळ व सगळ्या डाळी स्वच्छ निवडून धुवून चार ते पाच आधी तास भिजत घाला.डाळीमधे भिजायला घालतेवेळीच त्यात सुक्या लाल मिरच्या व मेथी दाणे  घाला.फक्त तांदुळ मात्रवेगळ्या भांड्यात भिजत घाला.(बाकी सर्व डाळी एकत्रच टाका)
चार-पाच तास भिजवून घेतल्यावर डाळी व तांदळामधील पाणी निथळून काढा आणि मिक्सरवर वाटून घ्या.वाटताना गरज वाटली तर डाळीतून काढलेलेच पाणी थोडे थोडे वापरा.
मिश्रण फार घट्ट अथवा पातळ असू नये.
नंतर हे मिश्रण एका भांड्यात काढून घेऊन त्यात सर्व मसाला व चवीनुसार मिठ घालून हलवावे.
आता तव्याला तेलाचे ब्रशिंग करून गरम तव्यावर डावाने डोसा घालून थोडा पसरून घ्या वर एक ताट झाकण ठेवून वाफ आणा व परत सगळीकडून थोडे तेल सोडून उलट बाजूने जरा भाजा.हे डोसे तसे जाडसरच असतात.
तयार डोसा नारळाची चटणी ,सांबार किवा पुदीना चटणी आवडीनुसार कशा बरोबरही सर्व्ह करा छानच  लागतो. हा डोसा गरम असतांना चटणी किंवा सांबार नसतांना नुसताही छान लागतो.
टीप:- या अडईडोश्याला नेहमीसारखे पीठ आंबवण्याची किंवा फुगण्याची गरज नसते.
या डोश्यांसाठी तुम्ही तुमच्या  आवडीनुसार डाळींचे प्रमाण कमी-जास्त घेऊ शकता.

Tuesday 3 April 2018

जोंधळ्याची उसळ

जोंधळ्याची उसळ


जोंधळे बारा तास पाण्यात भिजत घालायचे, मग उपसून फडक्यात बांधून ठेवायचे. दोन तीन दिवसात लांब मोड येतात.ही उसळ फक्त हिरवी मिरची मीठ आणि खोबरे घालून करायची. अगदी मोत्याच्या उसळीसारखी दिसते.  चवीला पण छानच लागते. अशाच प्रकारे गव्हाची आणि बाजरीची उसळ पण करतात.

Monday 2 April 2018

#अळू,माठ,पोकळा,चाकवत अशा पालेभाज्यांची #देठी (#रायता)

#अळू,माठ,पोकळा,चाकवत अशा पालेभाज्यांची #देठी (#रायता)


कृती : अळू,माठ,पोकळा,चाकवत अशा दळदार देठे असलेल्या पालेभाज्यांची देठे फेकून न देता त्यांची सालं काढून बारीक चिरून उकडून घेऊन थोडीशी मोहरी फेटून वा मिरची लोणचे मसाला घालून ,चवीनुसार मीठ,चवीपुरती साखर ,शेंगदाण्याचे दाण्याचे जाडसर कूट व गोड दही घालून कालवावे व वरून तूप,हिरव्या मिरच्या व जिर्यारची फोडणी द्यावी ....जेवतांना डावीकडचे लोणचे चटणी ऐवजी चांगले तोंडीलावणे होते...